1Pe 3 | GbrGAW | STEP

1 Peter 3

Awyidna Ntu Puwa Agmada Ɓo

1 – 2 Anyikwoza, fye vi fyaɓa ɓo, n nabai kwo to ɓai kna tnubua n Dagayi ɓeda nfye gnaɓa nyin, ɓa ye abui ntu fye ɓovi ɓo n hali manayi. Ofye hali manai ɓa gna ɓeda nɓai afa ɓeda n ʼgbeyi.

3 Fye to gye fya huwan n bmiya-bmiya yi n kwo ɓe ntu nyigun zhin; ɓo, n na kaya nabmiyai anyi nya yin ko aje manayi, kwo tukwokni manayin. 4 Ama fye ku bmiya n mi nfye abugba mi, n bmiya-bmiya yi n kwo mwasa dna n zafun, konu zhin nya manayi n Shekwoyi abye. 5 Ntuge anyikwoza agyi-gyiyi sapa-nya, nɓa ɓei na wyetu yi n Shekwoyi aba nyi, ɓei zhin ɓahin nyigun lainu–ɓa ku ze oɓa ʼɓa ɓeda-viyi. 6 Fye la dogbe n Saratu yi. Wo ɓei vi wo ɓa Ibrahim ɓo, wo gawo mwa-mwa ntuge wonu ɓei zhin puwa tukwoda, har woi yiwo ge, “Omi dagayi.” Fye vi owo fye, fya zhin oɓo manai ngye wo, ntuge efyenu zhin wa nyigun n saiye; oɓo edna nya ta shan shi nfya byem (ko misali ge fye ɓa wun ofyaɓa bugba yam.)

7 Ofye aɓa, fye zhin peceiye nfye anyikwoyi fye zhin nubo n ɓa bukatayi, fyei gaɓa mwa-mwa ngye aza nɓa to n kalayin, pa ge oho nho nyikwoyi, fye kun Shekwoyi anabarka gwonu, ntu cenu, n ho to zhin wo shikwo kuncen, ata wo fye aduwam.

8 Nsaiye ɓeda ye kwo ɓe fye abanu vinya. Fyeku ze ngye puwa yakwo ɓai dagma, fyei gye aje sun-sun fyei ye najei n bugba manayi n tukwo-gba yi. 9 Fye to gba ɓenukwoi ta n ɓenukwoyi yin. To gba aza ta n ɓa da ɓeda nukwoi tu n fye tukwon. Ama zhin aduwa Shekwoyi wa bmaɓa zhin, ntuge kwo bmiya ya zhin aza alheri, Shekwoyi ɓa tuyi anabarka ntu ce.

10 Nho cei pma ha bwa agmada, ha gye anyipyei manai jesun, to laho nyitala wanshi, ha gu ho gbe n na katace. 11 La bui ɓenukwoi si ha zhin ɓemanai. Zan bugbafu shin kwo hoi ɓa nyakwo na sipitai nu, ha vi ko dei-dei. 12 Ntuge Dagayi shiwo aɓi awyelo, woi wo oɓa aduwa njesun. Ama Dagayi awyeba gyi minagyi nnaza yi n ɓa zhin ɓenukwoyi.

13 Nshinsun-sun zaho tolo n wo ɓa zhin fye ɓenukwoyi n tu ge fye zhin ɓemanayim. 14 Ama kwo kola ze ge fye ɓa sin wahala ntu befyece zhin ɓo, anabarkada nu fyei. Fye to wo ɓa dnam, to efya bugba kukalam. 15 La Kristi shi nho bugba mi n gyi-gyi-yi ngye Dagayi. N zaha nyaɓo nko zhin hoi kpema wo lonu, ha gni n shiri yi zhin n saho-sahoi yi ha gna wo dna na tna n mwa-mwa gai ɓe.

16 Fye zhin oɓo kwo bmiya, n naza daɓo tu fye tukwo, ɓai yi fye n naye nukwoi yi she fye vi Yesu, vinyikwo a woɓa ntu ɓa ɓeda nukwoi ɓo. 17 Pa, n Shekwoyi cei pma fya sin wahala, kwo gna bmiya oza sin wahala ntu ɓemanai zhin ɓo, afa wahala sin ntu ɓenukwoi zhin ɓo.

Apma Azhigye Nya

18 Kristi ɓei ku wahala sin, wo ɓei fi bwa zungmanyi ntu eyi vinya alaifi ɓo. Koda-yake owo wohin tukwo wo to ɓei n laifiyi kwo gmanyi n, nnabai wa ɓe yi n Shekwoyi aba n tna Benukwoi. Koda-yake owo nayi ɓolafi, owo zafun ye n wye-wyeyi lo. 19 Dna n zafun ye nu n wo ɓei lo a zafun aba nɓa fi n kurkuku, wa zhin ɓa waʼazi — 20 a zafun aza nya nu tunyi dna n Nuhu anyipyei, n ɓa to ɓei wo Shekwoyi nyin ko da yake wo ɓela pmi ɓa dna bugbabwa esa n Nuhu ɓei ji eya nyi. Ama aza ngun nyimwa-nyimwa nu ɓei bwa pwo, to ɓa bwi nuwan yakwo yim. 21 (Nlonu batisma zhin dogbe, dna n batisma, yi wu ge alayi gni n efi n bwi-bwi yi dna n Kristi kalala n vingwo; to ntuge ala nayi cegye shinya n, ama ntuge dna n batisma zhin, yi pmi awye wu Shekwoyi nu, yi ɓa wo wa zhan ya bugba ya n laifi.) 22 Nsaiye Kristi dnalo n ʼshe, n sase tu n mwa, mwa aba n Shekwoyi bwai-zhe-bwa, amalaika, n na iko yi n ʼshe mi ɓa yazhi lo n wa bye ɓai vi wo ɓeda.